සංචාරක ආකර්ෂණය අතින් ලොව ඉදිරියෙන්ම සිටින රටක් බව යළිත් වරක් සනාථ කරමින්, 2026 වසරේ ලොව හොඳම දූපත් ගමනාන්තය ලෙස ශ්රී ලංකාව නම් කර තිබේ.
ගෝලීය සංචාරක වේදිකාවක් වන ‘Big 7 Travel’ මඟින් ප්රකාශයට පත් කරන ලද 2026 වසරේ ‘ලොව හොඳම දූපත් 50’ (The 50 Best Islands in the World) ලැයිස්තුවේ ප්රථම ස්ථානය දිනා ගැනීමට ශ්රී ලංකාව සමත්ව ඇත.
මෙම වාර්ෂික ශ්රේණිගත කිරීම්වල හත්වන සංස්කරණය මඟින් ශ්රී ලංකාව ලොව විශිෂ්ටතම දූපත් ගමනාන්තය ලෙස හඳුනාගෙන ඇති අතර, ඒ සඳහා මාධ්ය ආවරණය, සමාජ මාධ්ය ජනප්රියත්වය, නැඟී එන සංචාරක ප්රවණතා සහ සංස්කාරක මණ්ඩලයේ ඇගයීම් පදනම් කරගෙන තිබේ. ශ්රී ලංකාව මෙම ජයග්රහණය හිමිකර ගත්තේ ප්රංස පොලිනීසියාවේ මෝරියා (Mo’orea), යේමනයේ සොකෝත්රා (Socotra), පෘතුගාලයේ මැඩෙයිරා (Madeira) සහ ඉක්වදෝරයේ ගැලපගෝස් (Galápagos) වැනි ජාත්යන්තරව ප්රසිද්ධ දූපත් අභිභවා යමිනි.
ශ්රී ලංකාව මෙලෙස ප්රථම ස්ථානයට පත්වීමට බලපෑ ප්රධාන හේතු කිහිපයක් වෙයි. සැතපුම් 833ක් දිග මනරම් වෙරළ තීරය, මීදුමෙන් වැසුණු මධ්යම කඳුකරය සහ සශ්රීක තේ වතු, පොහොසත් සංස්කෘතික උරුමය සහ විශිෂ්ට ජෛව විවිධත්වය, වනජීවී සංචාර සඳහා ප්රසිද්ධ යාල ජාතික උද්යානය සහ යුනෙස්කෝ ලෝක උරුමයක් වන සීගිරිය පර්වත බළකොටුව ඒ අතර ප්රධාන වේ.
ශ්රී ලංකාවේ ඇති ස්වාභාවික සුන්දරත්වය, ඉතිහාසය, වනජීවීන් සහ සංස්කෘතික විවිධත්වය නිසා එය වෙනත් කිසිදු ස්ථානයකට නොදෙවැනි ගමනාන්තයක් බව ‘Big 7 Travel’ ආයතනය පෙන්වා දෙයි. මෙය ප්රකට දේශගවේෂක මාර්කෝ පෝලෝ විසින් වරක් ශ්රී ලංකාව ‘ලොව ඇති ප්රමාණයට සාපේක්ෂව විශිෂ්ටතම දූපත’ ලෙස කරන ලද විස්තරය තවදුරටත් තහවුරු කරන්නකි.
මේ වසරේ ලොව හොඳම දූපත් 10 අතර ශ්රී ලංකාවට ප්රමුඛස්ථානය හිමිව තිබෙන අතර, ඊට අමතරව ප්රංශ පොලිනීසියාව (මෝරියා), යේමනය (සොකෝත්රා), පෘතුගාලය (මැඩෙයිරා), ඉක්වදෝරය (ගැලපගෝස් දූපත), බහමාස් (ග්රේට් එක්සියුමා), සීෂෙල්ස්, අයර්ලන්තය (අචිල් දූපත), තායිලන්තය (කෝ ලයිප්) සහ ග්රීසිය (මිලොස්) සෙසු දූපත් වෙයි.