දුරකථන සිම්කාඩ්පත්වලට අදාළ ග්රාහක තොරතුරු නැවත ලියාපදිංචි කිරීම සඳහා වූ දැනට ක්රියාත්මක රෙගුලාසි සංශෝධනය කර නව රෙගුලාසි හඳුන්වාදීම සඳහා කැබිනට් අනුමැතිය හිමිව තිබේ.
ඒ අනුව 2019 අංක 01 දරන ග්රාහක සිම් කාඩ්පත් ලියාපදිංචි කිරීමේ රෙගුලාසි සංශෝධනය කිරීමට නියමිතව ඇත.
1991 අංක 25 දරන ශ්රී ලංකා විදුලි සංදේශ පනතේ විධිවිධාන අනුව 2019 අංක 01 දරන ග්රාහක සිම්කාඩ්පත් ලියාපදිංචි කිරීමේ රෙගුලාසි පසුගිය 2019 වසරේ අගොස්තු මස 02 දින ප්රකාශයට පත්කර ඇති අතර එම රෙගුලාසි එදිනෙන් පසුව නිකුත් කරන ලද සිම්කාඩ්පත් සඳහා පමණක් අදාළ වේ.
ඒ අනුව 2019-08-02 දිනට පෙර ලබා ගන්නා ලද ඇතැම් සිම්කාඩ්පත් පිළිබඳව ග්රාහක තොරතුරු දුරකථන ක්රියාකාරු සමාගම් සතුව නොමැති අතර ඒ හේතුවෙන් ඇතැම් නීති විමර්ශන කටයුතුවලදී ගැටලු සහගත තත්ත්වයක් නිර්මාණය වී තිබේ.
තවද වයස අවුරුදු 16-17 අතර ග්රාහකයින් ලියාපදිංචි කිරීමට සහ මෙරටට පැමිණෙන විදේශිකයින්ට සිම් කාඩ්පත් නිකුත් කිරීමට අදාළ නව විධිවිධාන ද ඇතුළත් කරමින් දැනට ක්රියාත්මකව පවතින රෙගුලාසි වර්තමාන අවශ්යතාවයන්ට ගැලෙපෙන පරිදි සංශෝධනය කිරීමේ අවශ්යතාවද රජය විසින් හඳුනාගෙන තිබේ.
ඒ අනුව අදාළ රෙගුලාසි සංශෝධනය කිරීම සඳහා ඩිජිටල් ආර්ථික අමාත්යවරයා ලෙස ජනාධිපතිවරයා විසින් කැබිනට් මණ්ඩලයට ඉදිරිපත් කර ඇති අදාළ යෝජනාව සඳහා අමාත්ය මණ්ඩල අනුමැතිය හිමිව ඇත.