මියන්මාර මුහුදු සීමාවට අනවසරයෙන් ඇතුළු වී ධීවර කටයුතුවල නිරතවීමේ චෝදනා මත අත්අඩංගුවට ගෙන වසර 7ක බරපතළ වැඩසහිත සිරදඩුවම් නියම වු ශ්‍රී ලාංකික ධීවරයින් 15 දෙනාට පොදු සමාව හිමිව තිබේ.
මියන්මාරයේ ශ්‍රී ලංකා තනාපති ජනක බණ්ඩාර මහතා පැවසුවේ,(16) දිනට යෙදී තිබු එරට නව අවුරුදු උත්සවය වෙනුවෙන් අදාළ පිරිසට පොදු සමාව ලබාදීමට මියන්මාර බලධාරීන් පියවර ගෙන ඇති බවය.
පසුගිය වසරේ දෙසැම්බර් මස 2වනදා රයන් පුතා 2 සහ ක්ලෝරස් යන බහුදින ධීවර යාත්‍රා දෙක සහ එහි සිටි ධීවරයින් 15 දෙනා මුහුදු සීමා උල්ලංඝනය කිරීම හා අනවසර ධීවර කටයුතුවල නිරත වීම යන චෝදනා මත මියන්මාරයේ ආරක්ෂක අංශ විසින් අත්අඩංගුවට ගෙන තිබිණි.
ඔවුන්ට එරෙහි අධිකරණ ක්‍රියාමාර්ගවලින් අනතුරුව සිරදඬුවම් නියමව තිබු අතර තානාපති කාර්යාලය අවස්ථා කිහිපයකදී සිදුකරන ලද ඉල්ලීම් සැලකිල්ලට ගනිමින් මෙලෙස එම ශ්‍රී ලාංකිකයින්ට පොදු සමාව ලබාගැනීමට හැකිවු බව තානාපති ජනක බණ්ඩාර මහතා පැවසුවේය.