2024 වසරේදී රටින් පලා යාමෙන් පසුව ප්‍රථම වරට නිල සන්නිවේදනයක් සිදු කරමින්, ඉන්දියාවේ ස්වයං-පිටුවහල්ව වෙසෙන බංග්ලාදේශ හිටපු අගමැතිනි ෂෙයික් හසීනා (Sheikh Hasina) මහත්මිය නැවත සිය රට පැමිණීම සඳහා නව විදේශගමන් බලපත්‍රයක් (passport) සහ ජාතික හැඳුනුම්පතක් (NID) නිකුත් කරන ලෙස සෝමදා ඉල්ලීමක් කර ඇති බව ‘රොයිටර්’ (Reuters) පුවත් සේවය දුටු ලේඛනයක දැක්වේ.
ලෝහිතමය මහජන නැගීසිටීමකින් ඇගේ දීර්ඝ කාලීන පාලනය අවසන් වී වසර දෙකකට වැඩි කාලයකට පසුව, එළඹෙන දෙසැම්බර් මාසයේදී නැවත බංග්ලාදේශයට පැමිණීමේ සැලැස්ම ක්‍රියාත්මක කිරීමට හසීනා මහත්මිය තැබූ පැහැදිලිම පියවර මෙය වේ. ඇගේ පක්ෂය මේ වන විට තහනම් කර ඇති රටක් තුළ මෙමගින් නව දේශපාලන සහ නීතිමය නොසන්සුන්තාවයන් මතුවීමේ ඉඩකඩක් නිර්මාණය වී ඇත.
අධිකරණය හමුවේ භාරවීම සඳහා නැවත රට පැමිණීමට සැලසුම් කරන බව ඇය රොයිටර් පුවත් සේවයට පවසා ඇති අතර, විවිධ විධිවිධාන සම්පූර්ණ කිරීමෙන් අනතුරුව ඊට අදාළ දිනය ප්‍රකාශයට පත් කරන බව ඇගේ සහායකයින් සඳහන් කළේය. ශිෂ්‍ය නායකත්වයෙන් පැවැති නැගීසිටීමට එරෙහිව මාරාන්තික මර්දනයක් දියත් කිරීමට නියෝග කිරීම සම්බන්ධයෙන් බංග්ලාදේශ යුද අපරාධ අධිකරණය විසින් පසුගිය වසරේ නොවැම්බර් මාසයේදී ඇය නොමැතිවම ඇයට මරණ දඬුවම නියම කරන ලද අතර, ඇය පිටුවහල්ව සිටිමින් එම චෝදනා ප්‍රතික්ෂේප කළාය.
”තාවකාලික රජය සහ අනෙකුත් බලධාරීන් විසින් ඇගේ දැනට පවතින බංග්ලාදේශ විදේශගමන් බලපත්‍රය සහ ජාතික හැඳුනුම්පත (NID) අවලංගු කර ඇති බවට වාර්තා වන පසුබිමක, අපගේ සේවාදායකයා වෙනුවෙන් නව බංග්ලාදේශ විදේශගමන් බලපත්‍රයක් සහ ජාතික හැඳුනුම්පතක් නිකුත් කිරීමට අවශ්‍ය පියවර ගන්නා ලෙස මම ගෞරවයෙන් ඉල්ලා සිටිමි,” යනුවෙන් ලන්ඩනයේ පිහිටි ‘Matrix Chambers’ හි හසීනා මහත්මියගේ නීතිඥයින් විසින් ඩෙල්ලිහි පිහිටි බංග්ලාදේශ මහ කොමසාරිස් කාර්යාලයේ වැඩබලන මහ කොමසාරිස් ප්‍රීති රහ්මාන් (Preeti Rahman) වෙත යවන ලද ලිපියේ සඳහන් වේ.
ඇගේ බංග්ලාදේශ පෞරත්වය පදනම් කරගනිමින් සහ “ජාත්‍යන්තර මානව හිමිකම් ප්‍රඥප්තීන් යටතේ පැනනගින බැඳීම්වලට” අනුකූලව මෙම අයදුම්පත් “ඉක්මනින්” සලකා බලන ලෙස එම ලිපියෙන් ඉල්ලා ඇත.
ඩෙල්ලිහි පසුවන රහ්මාන් හෝ ඩකා නුවර පසුවන අගමැති තාරික් රහ්මාන්ගේ (Tarique Rahman) මාධ්‍ය ප්‍රකාශකයින් මෙම අදහස් විමසීම්වලට වහාම ප්‍රතිචාර දක්වා නොමැත.
හසීනා මහත්මියගේ ඇවාමි ලීගය (Awami League) පක්ෂය ඇගේ පාලනය බිඳවැටීමට පෙර රටේ විශාලතම පක්ෂය වූ අතර, පසුව එය තහනමට ලක් විය. ඇගේ පක්ෂයේ සගයින්ගෙන් බොහොමයක් සිරගත කර ඇති අතර නැතහොත් ඉන්දියාවේ හෝ වෙනත් රටවල ස්වයං-පිටුවහල්ව පසුවෙති.
වාර කිහිපයකදී වසර 20ක් පුරා බංග්ලාදේශයේ අගමැතිනිය ලෙස පාලනය ගෙන ගිය හසීනා මහත්මියට තවමත් ජනතාවගෙන් කොටසකගේ සහය හිමිව පවතින අතර, වසර දෙකකට වැඩි කාලයක නොසන්සුන්තාවයෙන් පසුව ඩකා පාලනය ස්ථාවරත්වය ඇති කිරීමට උත්සාහ කරන මොහොතක ඇගේ නැවත පැමිණීම දේශපාලන බෙදීම් තවදුරටත් උග්‍ර කිරීමට හේතු විය හැක.
අනෙක් අතට, නව ඩෙල්ලිය ඇයට රැකවරණය ලබා දීමෙන් පසුව දැඩි ලෙස පළුදු වූ බංග්ලාදේශය සහ ඉන්දියාව අතර සබඳතා වැඩිදියුණු කිරීමට ද මෙය හේතුවක් විය හැක.