ඌව පළාත් සභා මැතිවරණ සමයේදී ශ්‍රී ලංකා සංචාරක ප්‍රවර්ධන කාර්යාංශයේ මුදල් අයථා ලෙස භාවිත කළ බවට එල්ල වී ඇති චෝදනාවකට අදාළව හිටපු අමාත්‍ය බැසිල් රාජපක්ෂ මහතා අත්අඩංගුවට ගැනීමේ වරෙන්තුවක් කොටුව මහේස්ත්‍රාත් අධිකරණය විසින් නිකුත් කර ඇත.
එසේම, ඉන්ටර්පෝල් (Interpol) සංවිධානය හරහා ‘රතු නිවේදනයක්’ (Red Notice) ලබා ගැනීමට අවශ්‍ය පියවර ගන්නා ලෙස මහේස්ත්‍රාත්වරයා අපරාධ විමර්ශන දෙපාර්තමේන්තුවේ (CID) නීති විරෝධී වත්කම් විමර්ශන කොට්ඨාසයට නියෝග කළ බව අද දෙරණ වාර්තාකරු පැවසීය.
සිදුවීමට අදාළව අපරාධ විමර්ශන දෙපාර්තමේන්තුව විසින් කරන ලද කරුණු දැක්වීම් සලකා බැලීමෙන් අනතුරුව අධිකරණය විසින් මෙම නියෝග නිකුත් කරන ලදී.
2014 වසරේදී ශ්‍රී ලංකා සංචාරක ප්‍රවර්ධන කාර්යාංශය වෙත වෙන් කරන ලද රුපියල් මිලියන 7.8ක මුදලක් එම කාර්යාංශයේ ප්‍රවර්ධන කටයුතු සඳහා යොදාගෙන නොමැති බව අපරාධ විමර්ශන දෙපාර්තමේන්තුවේ නීති විරෝධී වත්කම් විමර්ශන ඒකකය අධිකරණයට වාර්තා කර තිබුණි. ඒ වෙනුවට, ඌව පළාත් සභා මැතිවරණ සමයේදී ටී-ෂර්ට් (T-shirts) 12,000ක් ලබාදීම සඳහා අදාළ මුදල් අයථා ලෙස යොදාගෙන ඇති අතර, එමගින් රජයට මූල්‍යමය පාඩුවක් සිදු කර ඇති බවට චෝදනා එල්ල වී ඇත.