සවුදි අරාබි රාජධානියේ ශ්‍රී ලංකා තානාපති ඕ. එල්. අමීර් අජ්වඩ් (O. L. Ameer Ajwad) මහතා, රියාද් නුවර සිට කිලෝමීටර් 450ක් පමණ දුරින් පිහිටි දම්මාම් මධ්‍යම බන්ධනාගාරයේ (Dammam Central Prison) පසුවන අනෝජන් සිවරාසාගේ (Anojan Sivarasa) සුවදුක් විමසා බැලීමට සහ ඔහුගේ වත්මන් තත්ත්වය තහවුරු කරගැනීම සඳහා 2026 ඔක්තෝබර් 08 වන දින එහි සංචාරයක නිරත විය.
එම සංචාරය අතරතුර, තානාපතිවරයා අනෝජන් සිවරාසා සමඟ දීර්ඝ ලෙස සාකච්ඡා කළ අතර ඔහුගේ අවශ්‍යතා සහ ගැටලු පිළිබඳව ද අවධානය යොමු කළේය. ශ්‍රී ලංකා විදේශ කටයුතු, විදේශ රැකියා සහ සංචාරක අමාත්‍යාංශයේ මගපෙන්වීම යටතේ හැකි සෑම කොන්සියුලර් සහ නීතිමය සහයක්ම ලබාදීමට තානාපති කාර්යාලය බැඳී සිටින බව ඔහු නැවත තහවුරු කළේය. සෘජු සන්නිවේදනය පහසු කිරීම සඳහා තානාපතිවරයා සිය සම්බන්ධතා තොරතුරු ද අනෝජන් සිවරාසා වෙත ලබා දුන්නේය.
එම හමුවෙන් අනතුරුව, අනෝජන් සිවරාසා යහපත් සෞඛ්‍ය තත්ත්වයෙන් පසුවන බවත්, සවුදි බන්ධනාගාර බලධාරීන් ඔහුගේ සුභසාධනය පිළිබඳව අවධානයෙන් පසුවන බවත් තානාපති අමීර් අජ්වඩ් මහතා තහවුරු කළේය.
තානාපතිවරයා දම්මාම් මධ්‍යම බන්ධනාගාරයේ අධ්‍යක්ෂවරයා සහ බන්ධනාගාර වෛද්‍යවරයා ද හමුවිය. මෙම සංචාරය සඳහා පහසුකම් සැලසීමට ලබා දුන් සහයෝගය මෙන්ම අනෝජන් සිවරාසාගේ සෞඛ්‍යය සහ සුභසාධනය ආරක්ෂා කිරීම සඳහා දක්වන සැලකිල්ල පිළිබඳව ඔහු සිය කෘතඥතාව පළ කළේය.
එමෙන්ම, ශ්‍රේෂ්ඨාධිකරණය වෙත ඉදිරිපත් කෙරෙන ඇපීල් (ආයාචනා) ක්‍රියාවලිය සම්බන්ධයෙන් ද ශ්‍රී ලංකා තානාපති කාර්යාලය අනෝජන් සිවරාසා වෙත සහය ලබා දෙමින් සිටියි.
ශ්‍රී ලංකා තානාපති කාර්යාලය – රියාද්
2026 ඔක්තෝබර් 09