ශ්රී ලංකාවේ නව අධ්යාපන සංශෝධන යටතේ පාසල් දරුවන්ගේ බෑග්වල බර සැලකිය යුතු ලෙස අඩු කිරීමට අපේක්ෂා කරන බවත්, ඒ අනුව 2027 වසරේ සිට 6 ශ්රේණිය සඳහා මොඩියුල පදනම් කරගත් (module-based) ඉගෙනුම් ක්රමවේදයක් හඳුන්වා දීමට නියමිත බවත් අග්රාමාත්ය ආචාර්ය හරිනි අමරසූරිය මෙනෙවිය ප්රකාශ කළාය.
පාසල් බෑග්වල බර අඩු කිරීමට ගෙන ඇති පියවර සම්බන්ධයෙන් පාර්ලිමේන්තුවේදී නැගුණු ප්රශ්නයකට පිළිතුරු දෙමින් අග්රාමාත්යවරිය සඳහන් කළේ, මෙම සංශෝධන යටතේ හඳුන්වා දෙන ක්රියාකාරකම් පදනම් කරගත් ඉගෙනුම් ක්රියාවලිය මගින් සිසුන්ට නිවස සහ පාසල අතර රැගෙන යාමට සිදුවන පොත් සංඛ්යාව අඩුවන බවයි.
යෝජිත නව ක්රමය යටතේ, පන්ති කාමර ක්රියාකාරකම් සඳහා භාවිත කරන පොත් පාසලේම තැබීමට කටයුතු කෙරෙන අතර, එමගින් සිසුන්ට සෑම දිනකම එම පොත් එහා මෙහා රැගෙන යාමට සිදු නොවේ. සිසුන්ට එම පොත් නිවසට රැගෙන යාමට සිදුවන්නේ වාරය අවසානයේදී අදාළ වැඩකටයුතු සම්පූර්ණ කිරීමෙන් පසුව පමණක් බව ඇය පැවසුවාය.
එමෙන්ම 2027 වසරේ සිට 6 ශ්රේණිය සඳහා මොඩියුල පදනම් කරගත් ඉගෙනුම් ක්රියාවලියක් හඳුන්වා දෙන බව ද අග්රාමාත්යවරිය සඳහන් කළාය.
එහිදී විශාල පෙළපොත් වෙනුවට, අදාළ පාසල් වාරයට පමණක් අදාළ වන පරිදි සෑම විෂයයකටම වෙන් වූ මොඩියුල සිසුන් වෙත ලබා දෙනු ඇත.
මෙම වෙනස්කම් හේතුවෙන් සිසුන් විසින් රැගෙන යනු ලබන පාසල් බෑග්වල බර සැලකිය යුතු ලෙස අඩුවනු ඇතැයි අග්රාමාත්යවරිය වැඩිදුරටත් පැවසීය.