අමෙරිකා-ඉරාන රාමුගත ගිවිසුම යටතේ ඉරානය තුළ ආයෝජන දිරිගැන්වීම සඳහා අමෙරිකානු ඩොලර් බිලියන 300ක පෞද්ගලික අරමුදලක් සැලසුම් කර ඇතැයි රොයිටර් පුවත් සේවය වාර්තා කළේය.
එම දැවැන්ත මුදලින් අඩකට වඩා දැනටමත් වෙන් කර ඇතැයිද වාර්තා වේ. යුද්ධය සම්පූර්ණයෙන්ම අවසන් කිරීම සඳහා අවසන් එකඟතාවකට පැමිණීමට දෙපාර්ශ්වයම දිරිගැන්වීමක් ලෙස මේ අරමුදල සැලසුම් කර ඇති අතර, එම මුදල මුළුමනින්ම පෞද්ගලික අංශයේ අරමුදලින් සමන්විත බවට තොරතුරු වාර්තා වී ඇතැයි රොයිටර් පුවත් සේවය සඳහන් කළේය. මේ අරමුදල කිසිදු රටක රජයක් සම්බන්ධ නොවන පෞද්ගලික ආයෝජන ක්රමවේදයක් පමණක් බවත්, ඉරානයේ ප්රතිසංස්කරණ කටයුතු හෝ යුද හානි වන්දි ගෙවීමේ වැඩසටහනක් හෝ නොවන බවද වාර්තා වේ.
අමෙරිකාව, ගල්ෆ් රටවල්, ආසියාව, දකුණු අමෙරිකාව සහ අප්රිකාව කේන්ද්ර කරගත් ප්රබල සමාගම් රැසක් මේ අරමුදලට මූල්ය දායකත්වය ලබාදීමට එකඟ වී ඇති අතර, එම අරමුදල මඟින් ඉරානයේ ආයෝජන බලශක්ති, සැපයුම් දාම, නිෂ්පාදන සහ ප්රවාහන ක්ෂේත්ර සංවර්ධනය කිරිමට යොදවනු ඇතැයි වාර්තා වේ.
ප්රතිසංස්කරණ හා සංවර්ධන අරමුදල ලෙස නම් කිරිමට නියමිත මේ අරමුදල පිහිටුවීම හෝ ක්රියාත්මක කිරීම අමෙරිකාව සහ ඉරානය අතර අවසන් ගිවිසුමකට එළැඹෙන තුරු සිදුනොවනු ඇතැයිද රොයිටර් පුවත් සේවය සඳහන් කළේය. දෙපාර්ශ්වය අතර අත්සන් තැබීමට නියමිත දින 60ක අවබෝධතා ගිවිසුම් කාලය අතරතුර අදාළ ව්යාපෘති සැලසුම් කිරිම සහ එහි විෂය පථය තීරණය කිරීමට නියමිත බවද වාර්තා වේ.