මෙරට පුද්ගලයින් 12,000ක් විවිධ අනතුරු හේතුවෙන් වසරකදී මියයන බවත් ඒ අතරින් 3000ක පමණ පිරිසක් මියයන්නේ මාර්ගයේ සිදුවන අනතුරුවලින් බව රථවාහන පාලන හා මාර්ග ආරක්ෂාව පිළිබඳ නියෝජ්‍ය පොලිස්පති ඉන්දික හපුගොඩ මහතා පැවසීය. සමස්ත අනතුරුවලින් 1/4ක්ම රිය අනතුරුවලින් සිදුවන මරණ බවද නියෝජ්‍ය පොලිස්පතිවරයා අවධාරණය කළේය. මේ වසරේ ගෙවුණු කාලයේ සිදුවූ මාරක අනතුරු 1781න් 1897ක් ජීවිතක්ෂයට පත්ව ඇතැයිද ඉන්දික හපුගොඩ මහතා පෙන්වා දුන්නේය.
ශ්‍රී ලංකා රතු කුරුස මූලස්ථානයේ බදාදා දින (10) පැවැති මාධ්‍ය හමුවකට එක්වෙමින් ඔහු මේ බව සඳහන් කළේය. මිචිලින් ලංකා සමාගම, ශ්‍රී ලංකා රතු කුරුස සමාජය හා පොලීසිය එක්ව ත්‍රිරෝද රථ රියැදුරන් වෙනුවෙන් සංවිධාන කරන ප්‍රථමාධාර සහ ආරක්ෂක රිය පැදවීම පිළිබඳ පුහුණු වැඩසටහන සම්බන්ධයෙන් දැනුම්වත් කිරීමට මේ මාධ්‍ය හමුව පැවැත්විණි.
මේ යටතේ බස්නාහිර පළාතේ ත්‍රිරෝද රථ රියැදුරන් 500ක් පුහුණූ කෙරේ. මේ ව්‍යාපෘතිය 2026 වසරේ සිට අනෙකුත් පළාත්වලද ව්‍යාප්ත කිරීමට නියමිතය.
මෙහිදී නියෝජ්‍ය පොලිස්පති ඉන්දික හපුගොඩ මහතා මෙසේද පැවසීය.
“මෙරට වර්ග කිලෝමීටර් එක් ලක්ෂ දහසය දහස් තුන්සිය පනහක පමණ මාර්ග පද්ධතියක් තිබෙනවා. මෝටර් රථ ප්‍රවාහන කොමසාරිස් කාර්යාලයේ වාහන 85,50,569ක් (අසූපන් ලක්ෂ පනස් දහස් පන්සිය හැට නවයක්) ලියාපදිංචි වෙලා තිබෙනවා. ඉන් 49,94,596ක් යතුරුපැදි හා ත්‍රිරෝද රථ 11,87,383ක් ලියාපදිංචියි. වැඩියෙන්ම අනතුරුවලින් ජීවිතක්ෂයට පත්වෙන්නේ යතුරුපැදිකරුවන් හා ත්‍රිරෝද රථ රියැදුරන්. මාර්ග නීති හා මාර්ග සංඥාවලට අවනතවීම සියලු දෙනාගේම වගකීමක්. අපරික්ෂාකාරී රිය පැදවීම, නොසැලකිලිමත් ධාවනය, අන්තරාදායක ලෙස රිය පැදවීම, අධික වේගය, මත්ද්‍රව්‍ය භාවිත කර රිය පැදවීම, සංඥාවකින් තොරව වාහන හැරවීම, අධික විඩාව හේතුවෙන් නින්ද යාම බොහෝ අනතුරුවලට හේතු වුණා. 2023 වසරේ මාරක රිය අනතුරු 2231න් 2341ක් ජීවිතක්ෂයට පත්වෙලා. 2024දී මාරක රිය අනතුරු 2403න් 2521ක් ජීවිතක්ෂයට පත්වෙලා. 2025 සැප්තැම්බර් 8වන විට මාරක රිය අනතුරු 1781න් 1897ක් ජීවිතක්ෂයට පත්වෙලා. මෙය ව්‍යසනකාරී තත්ත්වයක්.
තිස් වසරක යුද්ධයෙන් 28,000ක් පමණ පිරිසක් මියගියා. මාර්ග අනතුරුවලින් වසර 10දී මේ ප්‍රමාණය මියයනවා. 2024දී බරපතළ තුවාල ලැබුවා 7157ක්. ඉන් 15% – 20% අතර පිරිසකගේ හිසට, කොඳු නාරටියට, බරපතළ තුවාල වෙලා ජීවිත කාලයම ඇඳට වැටිලා. එවැනි දෙයක් වුණාම පවුල්වල ආර්ථිකය බිඳ වැටෙනවා. පාසල් යන දරුවන්ගේ අධ්‍යාපනය බිඳ වැටෙනවා. අනතුරුවලට ලක්වෙන අය වෙනුවෙන් වසරකට බිලියන 130 -150ක් පමණ සෞඛ්‍ය අමාත්‍යාංශය වෙන් කරනවා. මේ පිළිබඳව අධ්‍යයනය කර රතු කුරුස සමාජයත්, මිඩ්ලින් ලංකා සමාගම හා ශ්‍රී ලංකා පොලීසියත්, බස්නාහිර පළාත් සභාව එක්ව මෙවැනි දැනුම්වත් කිරීම් ආරම්භ කර තිබෙනවා. තෝරා ගත් පාසල් දරුවන් 2500ට වැඩි පිරිසක් දැනුම්වත් කර තිබෙනවා. අනතුරක් සිදුවුණාම බොහෝ විට රෝගීන් රෝහල්ගත කරන්න ඉදිරිපත් වෙන්නේ ත්‍රිරෝද රථ රියැදුරන්. නමුත් ඔවුන්ගේ නොදැනුම්වත්කම නිසා අනතුරෙන් වූ තුවාලවලට වඩා වැඩි අනතුරක් විය හැකියි. මේ දැනුම්වත් කිරීමෙන් පසු රියැදුරුගේ නම, රියැදුරු බලපත් අංකය සඳහන් ස්ටිකරයක් වාහනයේ අලවනවා. ඒ වගේම ප්‍රථමාධාර උපකරණ සහිත මෙවලම් කට්ටලයකුත් ලබා දෙනවා. රෝගියෙක් රෝහල කරා ගෙන යන තෙක් ආරක්ෂාකාරීව කටයුතු කරන ආකාරය ගැන එහිදී දැනුම්වත් කෙරෙනවා.
වසරකදී පුද්ගලයන් 12000ක් අනතුරු හේතුවෙන් ජීවිතක්ෂයට පත්වෙනවා. එයින් 1/4ක්, 3000ක් පමණ මාර්ගයේ සිදුවන අනතුරුවලින් මියයනවා. 2030 වන විට මේ අනතුරු 50%කින් අවම කර ගත යුතු බව ලෝක සෞඛ්‍ය සංවිධානය සඳහන් කර තිබෙනවා.
අගොස්තු 31 වන විට 1,20,000ක් පමණ බිමත්ව රිය පැදවූවන් අත්අඩංගුවට ගෙන තිබෙනවා. මේ පොලීසියට හසු වූ ප්‍රමාණය පමණයි.