තවදුරටත් සිය රට තුළ රැඳී සිටීම සඳහා කාලසීමාව දීර්ඝ කිරීම ප්‍රතික්ෂේප කළ පාකිස්තාන බලධාරීන් ඇෆ්ගනිස්තාන සරණාගතයන් බලහත්කාරයෙන් පිටුවහල් කිරීම නැවත ආරම්භ කර ඇතැයි විදෙස් මාධ්‍ය වාර්තා කරයි.
පසුගිය 2023 වසරේ සැප්තැම්බරයේ සිට මේ දක්වා මිලියන 1.2කට ආසන්න සරණාගතයන් පිරිසක් පාකිස්තානයෙන් පිටුවහල් කර ඇතැයි සරණාගතයන් සඳහා වන එක්සත් ජාතීන්ගේ මහකොමසාරිස් කාර්යාලය නිවේදනය කර ඇතැයිද විදෙස් මාධ්‍ය වැඩිදුරටත් වාර්තා කරයි.
පාකිස්තාන රජයේ තීරණයෙන් පසුගිය ජූනි මාසයේදී කල් ඉකුත් වූ එරට නීත්‍යනුකූලව ලියාපදිංචි වී සිටින ඇෆ්ගන් සරණාගතයන් මිලියන 1.4ක් දුෂ්කරතාවට පත්වී ඇති බවත්, ඉන් වැඩි පිරිසක් පාකිස්තානයේ ඔවුන් සතුව තිබූ ඉඩකඩම් සහ ව්‍යාපාරික ස්ථාන විකුණා දමා ඇෆ්ගනිස්තානය බලා යෑමට තවත් වසරක පමණ කාලයක් ලබාදෙනු ඇතැයි අපේක්ෂාවෙන් පසුවූවන් බවත් වාර්තා වේ. පාකිස්තාන රජය විසින් ගනු ලැබූ මේ පියවර එක්සත් ජාතීන්ගේ සරණාගත ඒජන්සියේ දැඩි විවේචනයට ලක්වී ඇති බවද වාර්තා වේ.
පාකිස්තාන රජය විසින් පිටුවහල් කිරීමට නියමිත ඇෆ්ගන් සරණාගතයන්ගෙන් ලක්ෂ 8ක් පමණ එරට පුරවැසි බලපත්‍ර හිමියන් වන අතර ඔවුන් මේ වනවිට පිටුවහල් කිරීම සඳහා නැඟෙනහිර පන්ජාබ්, නිරිතදිග බලුකිස්තාන සහ දකුණුදිග සින්ද් ප්‍රාන්තවල රඳවා තබා සිටින බවද විදෙස් මාධ්‍ය සඳහන් කරයි.