ඊශ්‍රායල හමුදාවෙන් අඛණ්ඩව එල්ල වන ප්‍රහාර හමුවේ පැය 48ක් තුළ ගාසා තීරයේ සිවිල් වැසියන් 250 දෙනකු ඝාතනයට පත්වූ බව අල් ජසීරා පුවත් සේවය වාර්තා කරයි.
මෙම මස පලමුවනදා (01) රාත්‍රියේ සිදුවූ ප්‍රහාරවලින් 43 දෙනකු ඝාතනයට පත්වු බවත්, ඒ අනුව සති 5ක් තුළ පලස්තීනුවන් 600කට ආසන්න සංඛ්‍යාවක් ඊශ්‍රායල ප්‍රහාර හමුවේ ඝාතනයට පත්වු බවත් අල් ජසීරා පුවත් සේවය වැඩිදුරටත් වාර්තා කළේය.
ගාසා නුවර පිහිටි නේවාසික ගොඩනැඟිල්ලකට එල්ලවූ ප්‍රහාරයකින් ඉන්දුනීසියානු රෝහලේ අධ්‍යක්ෂවරයා සහ ඔහුගේ දරුවන් ඇතුළු පවුලේ සාමාජිකයන්ද මිය ගොස් ඇති අතර, ගාසා තීරයේ රෝහල්වල වෛද්‍ය කාර්ය මණ්ඩලයේ ආරක්ෂාව තහවුරු කරන ලෙස සංවිධාන රැසකින් ජාත්‍යන්තර ප්‍රජාවගෙන් ඉල්ලීම් කර ඇතැයිද වාර්තා වේ.
ඛාන් යූනිස් නුවර සරණාගත කඳවුරු රැසක් ප්‍රහාරයට ලක්වීම හේතුවෙන් එහි සිටි අවතැන්වූවන් දුෂ්කරතා රැසකට මුහුණ දී සිටින අතර, ආහාර හිඟය සහ වෛද්‍ය පහසුකම් ප්‍රමාණවත් නොවීම හේතුවෙන් සෞඛ්‍ය ගැටලු රැසක් මතුවී ඇතැයිද වාර්තා වේ.