රට තුළ ත්‍රිරෝද රථ පැදවීමට කැමති විදේශිකයන් සඳහා වන ක්‍රියාපටිපාටි පැහැදිලි කරමින් මෝටර් රථ ප්‍රවාහන දෙපාර්තමේන්තුව(DMT) නිවේදනයක් නිකුත් කර තිබේ.
නිවේදනයේ සඳහන් වන්නේ, ඔවුන් තාවකාලික බලපත්‍රයක් නිසි මාර්ග හරහා ලබාගත යුතු බවයි.
මෝටර් රථ ප්‍රවාහන කොමසාරිස් (පාලන) ඩී.පී.සී. උදය කුමාර මහතා පවසන්නේ, විදේශිකයන්ට ත්‍රිරෝද රථ පැදවීමට අවසර දෙන තාවකාලික රියදුරු බලපත්‍රයක් සඳහා සුදුසුකම් ලැබීමට පෙර ශ්‍රී ලංකාවේ ලිඛිත පරීක්ෂණයක් සහ ප්‍රායෝගික පුහුණුවක් ලබාගත යුතු බවයි.
2016 අංක 12 දරන තොරතුරු දැනගැනීමේ අයිතිවාසිකම් පනත යටතේ තොරතුරු සඳහා කරන ලද ඉල්ලීමකට ප්‍රතිචාර වශයෙන් ඔහු මෙම අදහස් පළ කළා.
රට තුළ විදේශිකයන්ට ත්‍රිරෝද රථ පැදවීම සඳහා රියදුරු බලපත්‍ර නිකුත් කිරීමට හෝ පහසුකම් සැලසීමට දෙපාර්තමේන්තුව විසින් වෙනත් කිසිදු සංවිධානයකට අවසර දී නොමැති බව ඔහු පෙන්වාදෙනවා.