ජෛව වෛද්‍ය පර්යේෂණ සඳහා වන ප්‍රදාන වලින් ඩොලර් බිලියන ගණනකට වැඩි ප්‍රමාණයක් වියදම් කපා හරින බව අමෙරිකා ජනාධිපති ඩොනල්ඩ් ට්‍රම්ප්ගේ පරිපාලනය නිවේදනය කර ඇත.
පුළුල් පිරිවැය ඉතිරි කිරීමේ පියවරවල කොටසක් ලෙස මෙම වියදම් කපා හැරීම සිදු කෙරෙන බව සදහන්ය.
කෙසේ නමුත් මෙම පියවර විද්‍යාත්මක දියුණුව අඩාල කරනු ඇතැයි ඇතැම් විද්‍යාඥයින් පෙන්වා දෙන බව බීබීසී පුවත් සේවය වාර්තා කරයි.
මේ පිළිබඳ සිකුරාදා ප්‍රකාශයක් නිකුත් කරමින් අමෙරිකාවේ ජාතික සෞඛ්‍ය ආයතනය (NIH) පැවසුවේ ගොඩනැගිලි, උපයෝගිතා සහ උපකරණ වැනි පර්යේෂණවලට අදාළ “වක්‍ර වියදම්” සඳහා ප්‍රදාන කපා හරින බවයි. “ලෝකයේ හොඳම වෛද්‍ය පර්යේෂණ එක්සත් ජනපදයට තිබිය යුතුය,” අමෙරිකාවේ ජාතික සෞඛ්‍ය ආයතනය සිය නිවේදනයේ සඳහන් කළේය.
සඳුදා සිට ක්‍රියාත්මක වන කප්පාදුවලින් ඩොලර් බිලියන 4ක් (£3.2bn) ඉතිරි කර ගත හැකි බව ආයතනය ඇස්තමේන්තු කර ඇත.
වක්‍ර පර්යේෂණ වියදම් සඳහා ප්‍රදාන ගෙවීම් අනුපාත සියයට 15කින් සීමා කරන බවත් සදහන් වේ. එය වර්තමාන පර්යේෂණ වියදම් සාමාන්‍ය අනුපාතය වන සියයට 30න් අඩකි.