ශ්‍රී ලංකා මුහුදු සීමාවට අනවසරයෙන් ඇතුළු වීම හේතුවෙන්, 2020 වසරේ සිට 2024 වසරේ මේ වන තෙක් අත්අඩංගුවට පත් ඉන්දීය ධීවර යාත්‍රා සංඛ්‍යාව 142ක් බව ධීවර අමාත්‍යාංශ වාර්තා සඳහන් කරනවා.
ධීවර අමාත්‍යාංශ අතිරේක ලේකම් ධම්මික රණතුංග මහතා සඳහන් කරන්නේ මෙම වසර 05 තුළ අත්අඩංගුවට පත් ඉන්දීය ධීවර යාත්‍රා 142 අතරින් 71ක් රාජසන්තක කර ඇති බවයි.
යාත්‍රා 55ක් සම්බන්ධයෙන් මේ වන විටත් නඩු විභාග වෙමින් පවතින බවයි ඔහු පවසන්නේ. මේ අතරින් වැඩිම ධීවර යාත්‍රා ප්‍රමාණයක් අත්අඩංගුවට පත්වී ඇත්තේ මෙම වසරේදීය. එම සංඛ්‍යාව 59කි. මෙයින් 24ක් රාජසන්තක කර තිබේ. මෙරට මුහුදු සීමාවට ඇතුළු වූ ඉන්දීය ධීවර යාත්‍රා 36ක් 2022 වසරේදී අත්අඩංගුවට ගෙන ඇති අතර, 2023දී ඉන්දීය ධීවර යාත්‍රා 34ක් අත්අඩංගුවට ගෙන තිබෙනවා.
මෙම අත්අඩංගුවට ගැනීම නාවික හමුදාව මඟින් සිදු කර තිබුණා.
වසර 2022දී එම ධීවර යාත්‍රාවලින් 24ක්ද 2023දී 12ක්ද 2021දී 10ක්ද රාජසන්තක කර තිබෙනවා.
මෙම ඉන්දු ලංකා ධීවර ගැටලුව පිළිබඳව අදහස් දක්වන අතිරේක ලේකම් ධම්මික රණතුංග මහතා පෙන්වා දෙන්නේ මෙය රාජත්‍රාන්ත්‍රික මට්ටමින් විසඳාගත යුතු බවයි.
“මේ සඳහා ඉන්දියාවේ සහ ශ්‍රී ලංකාවේ ඉහළ නිලධාරින්ගෙන් සමන්විත ක්‍රියාකාරි කමිටුවක් ස්ථාපිත කර තිබෙනවා.
කෙසේ වුවත් මෙරට මුහුදු සීමාව උල්ලංඝනය කරන විදේශීය ධීවර යාත්‍රා අත්අඩංගුවට ගැනීමට පවත්නා නීතිය උපරිමයෙන් ක්‍රියාත්මක වෙනවා.