ශ්‍රී ලංකාවෙන් සංක්‍රමණය වූ හත්දරු මිත්තණියක කැනඩාවේ යෝර්ක් විශ්ව විද්‍යාලයෙන් ශාස්ත්‍රපති උපාධියක් ලබා ගත් වයස්ගතම තැනැත්තා බවට පත්ව ඇතැයි වාර්තා වේ.
වරතා ෂන්මුගනාදන් නමැති 87වැනි වියේ පසුවන ඇය යොර්ක් සරසවියෙන් දේශපාලන විද්‍යා ශාස්ත්‍රපති උපාධියක් මෙලෙස ලබාගෙන තිබේ.
කැනඩාවේ ඔන්ටාරියෝහි වාසය කරන ෂන්මුගනාදන් මහත්මිය මෙසේ කියා ඇත. “එය සිත්ගන්නාසුළුයි. නොවැම්බර් පළමුවැනිදා මම සාමාන්‍ය ජීවිතයක් ගත කරන සාමාන්‍ය කාන්තාවක්. නොවැම්බර් දෙවෙනිදා මම උපාධිය ලැබීමත් සමඟ සියල්ල වෙනස් වුණා,”
යෝර්ක් විශ්ව විද්‍යාලයේ ප්‍රකාශිකා ග්ලෝරියා සුහාසිනි ඇය විශ්ව විද්‍යාලයේ වයස්ගතම ශාස්ත්‍රපති උපාධිධාරිනිය බවට තහවුරු කළ අතර ෂන්මුගුනාදන්ගේ උපාධිය ශ්‍රී ලංකාවේ සිවිල් යුද්ධය සහ සාමය ළඟා කර ගැනීමේ උත්සාහයන් කෙරෙහි අවධානය යොමු කරමින් අවසන් නිබන්ධනය රචනා කර ඇතැයි දන්වා සිටියාය. “මෙය කවදත් මගේ සිහිනයක්, දේශපාලනය හැදෑරීම සහ එයින් ඉහළ උපාධියක් ලබා ගැනීම, අවසානයේ එය සාක්ෂාත් කර ගැනීම ගැන මම සතුටු වෙමි,” ඇය පැවසුවාය.
මෙය ෂන්මුගනාදන්ගේ පළමු ශාස්ත්‍රපති උපාධිය නොවේ. ඉන්දියාවේ මදුරාසි විශ්වවිද්‍යාලයෙන් ප්‍රථම උපාධිය ලබා ගැනීමෙන් පසු ඇය නැවත ශ්‍රී ලංකාවට පැමිණ ඉන්දීය ඉතිහාසය සහ ඉංග්‍රීසි ඉගැන්වීම සඳහා පැමිණියාය. 1990 දී ඇය ඉංග්‍රීසි දෙවන භාෂාවක් ලෙස ඉගැන්වීමට ලන්ඩනයට ගිය අතර ලන්ඩන් විශ්ව විද්‍යාලයෙන් ව්‍යවහාරික වාග් විද්‍යාව පිළිබඳ ප්‍රථම ශාස්ත්‍රපති උපාධිය ලබා ගත්තාය. 2004 දී ෂන්මුගනාදන් කැනඩාවට සංක්‍රමණය වූයේ යෝර්ක් විශ්ව විද්‍යාලයේ Schulich School of Business වෙතින් MBA උපාධියක් ලබා ඇති ඇගේ දියණිය සමඟ සිටීමටය.
විශ්ව විද්‍යාලය ජ්‍යෙෂ්ඨ පුරවැසියන්ට නොමිලේ උපකාරක පන්ති පිරිනමන බව ඇය දැනගත් විට, දේශපාලන විද්‍යාව හැදෑරීමේ සිහිනය සැබෑ කර ගැනීමට අවසානයේ තමාට ලැබුණු අවස්ථාව බව ෂන්මුගනාදන් පැවසුවාය.
ඇය 2019 දී සිය අධ්‍යයන කටයුතු ආරම්භ කළ අතර නොවැම්බර් 2වන දින අනෙකුත් සිසුන් 4,000ක් සමඟ උපාධිය ලබා ගත්තාය.
ජීවිත කාලය පුරාවටම ඉලක්කයක් සපුරා ගත්තද ෂන්මුගනාදන් පැවසුවේ ඇය තවමත් සම්පූර්ණ වී නොමැති බවයි. ඇයගේ මීළඟ සැලසුම් සහගත ප්‍රයත්නය පශ්චාත් යුධ ශ්‍රී ලංකාව සහ සාමය සඳහා වූ අපේක්ෂාවන් පිළිබඳ පොතක් ලිවීම බව පවසන ඇය, තම කතාව අන් අයගේ ඇස් පාදන්නට පොළඹවනු ඇතැයි බලාපොරොත්තු වන බව පැවසුවාය.
“ඔබට සැමවිටම ජීවිතයේ ඉලක්කයක් තිබිය යුතුයි,ඔබට අනුගමනය කිරීමට අවශ්‍ය සිහිනය කුමක්දැයි සොයා බලා අවසානය දක්වා එය හඹා යන්න. ඔබට උනන්දුවක් දක්වන, නමුත් අන් අයට ප්‍රයෝජනවත් වන දෙයක් ගැන සිතන්න. එය පසුපස යන්න, එය ලබා ගන්න, එය කරන්න, එය සාක්ෂාත් කර ගන්න.” ඇය පැවසුවාය.