අමෙරිකානු ජනාධිපති ඩොනල්ඩ් ට්රම්ප්ගේ ඉල්ලීම නොතකා ඊශ්රායලය දිගින් දිගටම ලෙබනනයට ප්රහාර එල්ල කරමින් සිටින බව විදෙස් මාධ්ය වාර්තා කරයි.
අමෙරිකා- ඉරාන සාම ගිවිසුමට ඇතුළත් කරුණු මෙතෙක් ප්රකාශයට පත්නොවුවද, එම ගිවිසුමට ලෙබනනයද ඇතුළත් වන බව ඉරානය සහ සාම ගිවිසුමේ මැදිහත් පාර්ශ්වය වන පාකිස්තානය සඳහන් කර ඇති අතර, ඊශ්රායලයේ ක්රියාකලාපය හේතුවෙන් සාම ගිවිසුමට බලපෑම් එල්ල වී ඇතැයි වාර්තා වේ. ඊශ්රායල අගමැති බෙන්ජමින් නෙතන්යාහු ලෙබනනය සම්බන්ධව මීට වඩා වගකීමෙන් කටයුතු කළ යුතු බව ජී 7 සමුළුවේදී ඩොනල්ඩ් ට්රම්ප් ප්රකාශ කර ඇති අතර, ලෙබනන් ප්රහාර නවත්වන ලෙස ඔහු කළ ඉල්ලීම නොතකා ඊශ්රායලය අඛණ්ඩව පහර දීම ඉරානයේ දැඩි කනස්සල්ලට හේතු වී ඇතැයි විදෙස් මාධ්ය වැඩිදුරටත් වාර්තා කරයි.
අමෙරිකාව සමඟ අවබෝධතා ගිවිසුමට එළැඹීමෙන් පසුව ඊශ්රයාල හමුදාව 84 වතාවක් සටන් විරාමය උල්ලංඝනය කළ බවට ඉරානය චෝදනා කර ඇතැයිද, ලෙබනනයට පහරදීම අඛණ්ඩව සිදුවන්නේ නම් දැඩි ප්රතිචාර දක්වන බවට අනතුරු අඟවා ඇතැයිද විදෙස් මාධ්ය සඳහන් කරයි.
ඩොනල්ඩ් ට්රම්ප්ගේ ඉල්ලීම සහ ඉරානයේ අනතුරු ඇඟවීම නොතකා ඊශ්රායල හමුදාව පෙරේදා දිනයේදීත් දකුණු ලෙබනනයට නවතම ප්රහාර මාලාවක් එල්ල කර ඇති අතර, ලෙබනනයේ සෞඛ්ය අමාත්යාංශය ප්රකාශ කර ඇත්තේ එම ප්රහාරවලින් පුද්ගලයන් සිවුදෙනකු ජීවිතක්ෂයට පත්වූ බවය. ලෙබනනයේ රාජ්ය පුවත් ඒජන්සිය සඳහන් කර ඇත්තේ ඊයේ උදෑසන ඊශ්රායල ප්රහාරක ජෙට් යානා නබාටියා අල් ෆව්කා නගරයට සහ ක්ෆාර් ටෙබ්නිට් ප්රදේශවලට දරුණු ප්රහාර එල්ල කර ඇති බවය. නවතම ප්රහාරය සම්බන්ධව ඊශ්රායල අගමැතිවරයා හෝ හමුදාව මෙතෙක් කිසිදු ප්රකාශයක් සිදු කර නැති අතර, ඉරානයේ සහාය ලබන හෙස්බුල්ලා සංවිධානය ඉලක්ක කරමින් ප්රහාර එල්ල කරන බව ඊශ්රයාලය මීට පෙර ප්රකාශ කර තිබිණි.