කැනඩාවේ රැකියා ලබාදෙන බව පවසා රුපියල් කෝටි 3ට ආසන්න මුදලක් වංචා කළ පුද්ගලයින් තිදෙනෙකු ශ්රී ලංකා විදේශ සේවා නියුක්ති කාර්යාංශයේ විශේෂ විමර්ශන අංශයේ නිලධාරීන් විසින් අත්අඩංගුවට ගෙන තිබේ.
කැනඩාවේ ඇති ආයතනයට සම්බන්ධයක් ඇති බව පවසමින් මොවුන් දිවයිනේ විවිධ ප්රදේශවල පදිංචි පුද්ගලයින්ගෙන් රුපියල් කෝටි 3ට ආසන්න මුදලක් වංචා කර ඇති අතර, ඒ පිළිබඳව කාර්යාංශයට පැමිණිලි 9ක් ලැබී තිබිණි.
මෙම වංචාවට සම්බන්ධ එක් සැකකරුවෙකු පසුගිය මාර්තු මාසයේදී අත්අඩංගුවට ගෙන ඇති අතර, ඔහු විසින් අනෙක් පුද්ගලයින්ගේ ගිණුම්වලට මුදල් බැර කර ඇති බවට විමර්ශනවලදී අනාවරණය වී තිබේ.
ඒ අනුව අදාළ අනෙක් සැකකරුවන් දෙදෙනා අප්රේල් මස 08 හා 09 යන දිනයන්හීදි විමර්ශන නිලධාරීන් විසින් අත්අඩංගුවට ගනු ලැබීය.
එම සැකකරුවන් දෙදෙනා (09) කඩුවෙල මහේස්ත්රාත් අධිකරණය වෙත ඉදිරිපත් කිරීමෙන් අනතුරුව ඇප මත මුදාහැරීමට මහේස්ත්රාත්වරයා නියෝග කර තිබේ.
1985 අංක 21 දරණ ශ්රි ලංකා විදේශ සේවා නියුක්ති කාර්යාංශ පනත අනුව විදේශ රැකියා සඳහා බඳවාගැනීම හා මුදල් අය කිරීම නීති විරෝධි වන අතර, ඒ සඳහා කාර්යාංශයේ බලපත්රලාභී විදේශ රැකියා නියෝජිතායතනවලට පමණක් අවසර හිමිවේ.
එබැවින් බලපත්රලාභී විදේශ රැකියා නියෝජිතායතනයක් නොවන වෙනත් බාහිර පුද්ගලයින්ට මුදල් හෝ විදේශ ගමන් බලපත්ර ලබාදීමෙන් වලකින මෙන් කාර්යාංශය රැකියා අපේක්ෂිතයින්ගෙන් ඉල්ලා සිටියි.
එසේම විදේශ රැකියාවක් ලබාදීමට යම් අයෙකුට මුදල් ලබාදීමට පෙර ඒ පිළිබඳව 1989 අංකය ඇමතීම මගින් කාර්යාංශයෙන් තොරතුරු විමසා බලන ලෙස කාර්යාංශය වැඩිදුරටත් ඉල්ලීමක් කර ඇත.