මගී බස් රථවල රියදුරන් සහ කොන්දොස්තරවරුන් මත්ද්‍රව්‍ය භාවිතා කර තිබේද යන්න පරීක්ෂා කිරීමේ ජංගම බස් රථ සේවාව හඳුන්වාදීම මාකුඹුර බහුවිධ ප්‍රවාහන මධ්‍යස්ථානයේ දී ඊයේ (24) ආරම්භ වුණා.
ඒ ප්‍රවාහන අමාත්‍ය බිමල් රත්නායක මහතාගේ ප්‍රධානත්වයෙන්.
දිවයිනේ විවිධ ප්‍රදේශවලදී අහඹු ලෙස තෝරා ගන්නා බස් රථවල සේවයේ නිරතව සිටින රියදුරු සහ කොන්දොස්තරවරුන්ගේ කෙටි පරීක්ෂණයක් මගින් ඔවුන් මත්ද්‍රව්‍ය ලබාගෙන ඇත්දැයි සොයා බැලීමට අවශ්‍ය පහසුකම් මෙම ජංගම බස් රථය තුළ සපයා තිබෙනවා.
මෙහිදී අදහස් දැක්වූ ජාතික ප්‍රවාහන වෛද්‍ය ආයතනයේ සභාපති යූ.ජී.සී පෙරේරා මහතා සඳහන් කළේ, පළමු අදියරේදී බස් රථවල රියදුරු කොන්දොස්තරවරුන් පරික්ෂා කිරීම සිදුකළ පසු, ඉන් අනතුරුව අනෙකුත් රථවාහනවල රියදුරන්ද මත්ද්‍රව්‍ය ලබා ගෙන ඇද්දයි පරීක්ෂා කිරීමට කටයුතු කිරීමේ සැලැස්මක් පවතින බවයි.