ඉරාන ආරක්ෂක අමාත්‍යාංශය සඳහන් කළේ, ටෙහෙරාන් අගනුවර ආසන්නයේදී ඔහු ගමන්ගත් රථය ඉලක්ක කළ සන්නද්ධ ත්‍රස්තවාදීන් පිරිසක් ඔහුව ඝාතනය කර ඇති බවයි. මෙහිදී ෆක්රිසාදේගේ ආරක්ෂක භටයින් සහ ත්‍රස්තවාදීන් අතර හටගත් ගැටුමෙන් ඔහු තුවාල ලැබුවේ ය.
මෙම ක්‍රියාව දැඩිසේ හෙළාදුටු ඉරාන විදේශ අමාත්‍ය මොහොමඩ් ජාවඩ් සරීෆ් ප්‍රකාශ කළේ, ප්‍රහාරයට ලක් වූ න්‍යෂ්ටික විද්‍යාඥයා ප්‍රතිකාර කිරීම සඳහා රෝහල වෙත රැගෙන යමින් තිබියදී මිය ගිය බවත්, එය ඊශ්‍රායාලය විසින් කරන ලද ත්‍රස්ත ක්‍රියාවක් බවයි.2010 – 2012 කාලය තුළ ඉරානයේ න්‍යෂ්ටික විද්‍යාඥයින් 4 දෙනෙකු ඝාතනයට ලක් වූ අතර එරට පවසන්නේ ඊශ්‍රායාලය මෙම ඝාතන මෙහෙය වූ බවය.
ඉරානයේ රහසිගත න්‍යෂ්ටික අවි වැඩසටහනකට ෆක්රිසාදේ සම්බන්ධ බවට බටහිර බුද්ධි අංශ සැකපළ කර තිබේ. 2014 වසරේදී එක් බටහිර රාජ්‍යතාන්ත්‍රිකයකු රොයිටර් පුවත් සේවයට පවසා සිටියේ, ඉරානය කිසියම් දිනක න්‍යෂ්ටික අවි නිෂ්පාදනයට යොමුවුවහොත් ෆක්රිසාදේ ඉරාන බෝම්බ නිර්මාණයේ පියා ලෙස හැඳින්වෙනු ඇති බවය.
කෙසේ වෙතත් සිය න්‍යෂ්ටික වැඩසටහන සාමකාමී අරමුණු මුල්කර ගනිමින් සිදු කෙරෙන බව ඉරානය පවසයි. ඉරානය යුරේනියම් බලගැන්වීම ඉහළනංවා ඇති පසුබිමකදී මෙම විද්‍යාඥයාගේ මරණය වාර්තා වීම විශේෂත්වයකි. සිවිල් න්‍යෂ්ටික බලගැන්වීම සහ හමුදා න්‍යෂ්ටික අවි නිෂ්පාදනයට මෙම බලගැන් වූ යුරේනියම් යොදා ගැනේ.
2015 වසරේදී ඉරානය ලෝක බලවතුන් 6 දෙනෙකු සමග එලඹි ගිවිසුමෙන් එරට යුරේනියම් බලගැන්වීම සීමා කෙරුණු නමුත් ජනපති ට්‍රම්ප් 2018 වසරේදී මෙම ගිවිසුමෙන් ඉවත්වීමත් සමග ඉරානය යළි සිය න්‍යෂ්ටික වැඩසටහනේ කටයුතු ආරම්භ කළේ ය. මෙවර අමෙරිකානු ජනාධිපතිවරණයෙන් තේරී පත් වූ ජෝ බයිඩන් සඳහන් කළේ, ලබන ජනවාරියේ වැඩ භාරගැනීමෙන් පසු ඉරානය සමග යළි සබඳතා අරඹන බවයි.
