පොලීසියට අලුතින් 10,000ක්: නිල ඇඳුමත් වෙනස් වෙයි!
ජනාධිපතිවරයාගේ නායකත්වය යටතේ වෘත්තීය මට්ටමේ පොලිස් සේවයක් සහ වෘත්තීය පොලිස් නිලධාරීන් පිරිසක් නිර්මාණය කිරීම සඳහා පියවර ගැනීමට රජයට හැකි වී ඇති බව මහජන ආරක්ෂක අමාත්‍ය ආනන්ද විජේපාල මහතා පවසයි.
අමාත්‍යවරයා මේ බව ප්‍රකාශ කළේ 85 වන පොලිස් මලල ක්‍රීඩා උළෙලට සහභාගී වෙමිනි.
පොලිස් සේවයේ ගුණාත්මක වර්ධනයට සමගාමීව පොලිස් නිල ඇඳුම සඳහා නව සැලසුමක් (Design) හඳුන්වා දීමට දැනට සැලසුම් සකස් කරමින් පවතින බව ද ඔහු වැඩිදුරටත් පැවසීය.
එමෙන්ම එළඹෙන වසර තුළ පොලිස් සේවය සඳහා තවත් නිලධාරීන් 10,000ක් අලුතින් බඳවා ගැනීමට පියවර ගන්නා බව ද අමාත්‍යවරයා සඳහන් කළේය.
පසුගිය වසර පහක කාලය තුළ ප්‍රමාද වී තිබූ සියලුම උසස්වීම් ජ්‍යෙෂ්ඨත්වය, දක්ෂතාව, කාර්යක්ෂමතා පරීක්ෂණ සහ විභාග පටිපාටීන් මත පදනම්ව මෙම වසර තුළ ලබා දෙන බව ද ඔහු පැවසීය.
අමාත්‍ය විජේපාල මහතාට අනුව, තරාතිරම හෝ පදවිය මත කිසිදු වෙනස්කමකින් තොරව කනිෂ්ඨ නිලධාරීන්ගේ සිට ජ්‍යෙෂ්ඨ නිලධාරීන් දක්වා සියලුම පොලිස් නිලධාරීන්ට විදේශීය පුහුණු අවස්ථා ලබා දීමේ ක්‍රමවේදයක් ද සකස් කරමින් පවතී.
පොලිස් නිලධාරීන්ගේ සේවය ඇගයීම උදෙසා 2027 අයවැය මගින් විශේෂ අවදානම් දීමනාවක් (Risk allowance) ලබා දීමට අමාත්‍ය මණ්ඩල අනුමැතිය හිමිව ඇති බව ද ඔහු ප්‍රකාශ කළේය.
මීට අමතරව පොලිස් නිලධාරීන් සඳහා විදුලි මෝටර් සයිකල් (Electric motorcycles) සහ සූදානම් කළ අනෙකුත් යටිතල පහසුකම් ලබා දීමට ද සැලසුම් කර ඇති බව ඔහු වැඩිදුරටත් පැවසීය.
තවදුරටත් අදහස් දැක්වූ අමාත්‍ය ආනන්ද විජේපාල මහතා මෙසේ පැවසීය:
”අවුරුදු පහක කාලයක් තිස්සේ උසස්වීම් ප්‍රමාද වෙලා තිබුණා. ජ්‍යෙෂ්ඨත්වය, දක්ෂතාව, කාර්යක්ෂමතා පරීක්ෂණ හෝ විභාග මත පදනම්ව ඒ උසස්වීම් සියල්ල මෙම වසර තුළ ලබා දී අවසන් කිරීමට අපි අවශ්‍ය සියලු පියවර ගෙන තිබෙනවා. එතැන් සිට, සෑම වසරකම නියමිත කාල සීමාවන් තුළ නිලධාරීන්ට උසස්වීම් ලැබෙන පරිදි විධිමත් උසස්වීම් ක්‍රමවේදයක් අපි ස්ථාපිත කරනවා.
එමෙන්ම විධිමත් ස්ථාන මාරුවීම් ක්‍රමවේදයක් ද දැනට සකස් කරමින් පවතිනවා. එම ක්‍රමවේදය හරහා නිලධාරීන්ගේ නිවෙස්වලට ආසන්න ප්‍රදේශවලට ස්ථාන මාරුවීම් ලබා දීමට කටයුතු සම්පාදනය කෙරෙනවා.
පසුගිය වසර දෙක තුළ නිලධාරීන් 1,000කට ආසන්න සංඛ්‍යාවකට විදේශීය පුහුණුව ලබා දී තිබෙනවා. අපි මෙම වැඩසටහන තවදුරටත් ශක්තිමත් කරමින්, තරාතිරම නොබලා කනිෂ්ඨ මට්ටමේ සිට ජ්‍යෙෂ්ඨ මට්ටම දක්වා සියලුම නිලධාරීන්ට විදේශීය පුහුණු අවස්ථා ලබා දීමේ ක්‍රමවේදයක් සකස් කරනවා,” යැයි ඔහු වැඩිදුරටත් පැවසීය.
About The Author
