යුද්ධයෙන් වසර 17කට පසුත් වගවීමක් නෑ: එක්සත් ජාතීන්ගෙන් ශ්‍රී ලංකාවට දැඩි නියෝග
ශ්‍රී ලංකාවේ සිවිල් යුද්ධය අවසන් වී වසර 17කට පසුවත්, යුද සමයේ සිදුවූ බව කියන බරපතල මානව හිමිකම් උල්ලංඝනය කිරීම් සහ ජාත්‍යන්තර අපරාධ සම්බන්ධයෙන් නිසි වගවීමක් නොමැති වීම පිළිබඳව එක්සත් ජාතීන්ගේ මානව හිමිකම් මහකොමසාරිස් වෝල්කර් ටර්ක් (Volker Türk) සහ Human Rights Watch (HRW) සංවිධානය සිය දැඩි කනස්සල්ල පළ කර ඇත.
සැප්තැම්බර් 3 වැනිදා නිකුත් කරන ලද එක්සත් ජාතීන්ගේ වාර්තාව මගින්, අතීත මානව හිමිකම් උල්ලංඝනය කිරීම් සම්බන්ධයෙන් සාධාරණය ඉටුකරන බවට පොරොන්දු වෙමින් 2024 සැප්තැම්බර් මාසයේදී බලයට පත් වූ ජනාධිපති අනුර කුමාර දිසානායක මහතාගේ රජය යටතේ පවතින මානව හිමිකම් තත්ත්වය ඇගයීමට ලක්කර ඇත.
එල්.ටී.ටී.ඊ. සංවිධානය සමග පැවැති යුද්ධයේදී සියලු පාර්ශ්වයන් විසින් සිදුකරන ලදැයි පැවසෙන අපරාධ සම්බන්ධයෙන් නිසි පිළිගැනීමක් හෝ වගවීමක් සිදුව නොමැති බව එහි සඳහන් වේ.
එම අදහස් තවදුරටත් තහවුරු කරමින් HRW සංවිධානයද පෙන්වා දෙන්නේ, බලහත්කාරයෙන් අතුරුදහන් කරවීම්, සහන සේවකයන් ඝාතනය කිරීම් සහ මාධ්‍යවේදීන්ට එල්ල වූ ප්‍රහාර සම්බන්ධ නඩුවල කිසිදු ප්‍රගතියක් නොමැති බවයි. එමෙන්ම, ස්වාධීන මහජන පැමිණිලිකාර කාර්යාලයක් පිහිටුවීමට හෝ මානව හිමිකම් කවුන්සිලයේ ශ්‍රී ලංකා වගවීමේ ව්‍යාපෘතිය (Sri Lanka Accountability Project) පිළිගැනීමට රජය තවමත් පියවර ගෙන නොමැති බවද එම සංවිධානය සඳහන් කරයි.
මෙම වාර්තා මගින් ත්‍රස්තවාදය වැළැක්වීමේ පනත (PTA) තවදුරටත් භාවිත කිරීම පිළිබඳවද විශේෂ අවධානයක් යොමුකර ඇත. විශේෂයෙන්ම උතුරු සහ නැගෙනහිර පළාත්වල මානව හිමිකම් ක්‍රියාකාරීන්, මාධ්‍යවේදීන් සහ වින්දිතයන්ගේ පවුල්වල සාමාජිකයන් තවදුරටත් රාජ්‍ය බුද්ධි අංශවල නිරීක්ෂණයට ලක්වන බව පෙන්වා දෙයි.
ඒ අනුව, ත්‍රස්තවාදය වැළැක්වීමේ පනත අහෝසි කරන තෙක් එය භාවිත කිරීම වහාම අත්හිටුවන ලෙසත්, අදාළ පනත යටතේ දීර්ඝ කාලයක් අත්අඩංගුවේ පසුවන්නන් නිදහස් කරන ලෙසත් එක්සත් ජාතීන්ගේ මානව හිමිකම් ප්‍රධානියා රජයෙන් ඉල්ලා සිටී. එමෙන්ම, ප්‍රමාද වී ඇති නීතිමය හා ආරක්ෂක අංශ ප්‍රතිසංස්කරණ වහා ක්‍රියාත්මක කරමින් සැබෑ සංහිඳියාවක් උදෙසා පියවර ගන්නා ලෙසද හෙතෙම රජයෙන් ඉල්ලා සිටියි.
About The Author
