Type to search

(VIDEO) මුල් වරට රාජ්‍ය ඔත්තු සේවයටත් තේමා ගීතයක්

100% ස්වභාවික පෝෂ්‍යදායි ප්‍රෝටීන් පිටි - ORA Naturals

ශ්‍රී ලංකාවේ පැරණිතම බුද්ධි සේවාව වන රාජ්‍ය බුද්ධි සේවාව 2021 ඔක්තෝම්බර් මස 01 වන දිනට යෙදුනු සිය 80 වන සංවත්සරය ආරක්‍ෂක, ජාතික ආරක්‍ෂක හා ආපදා කළමණාකරන අමාත්‍යාංශයන්හි ලේකම් ජෙනරාල් කමල් ගුණරත්න (විශ්‍රාමික) මැතිතුමන්ගේ ප්‍රධානත්වයෙන් සෞඛ්‍ය මාර්ගෝපදේශයන්ට අනුකූලව චාම් හා අභිමානවත් ලෙස පැවැත්වීය.

මෙම උත්සවයට පෙරදින පස්වරුවේ රාජ්‍ය බුද්ධි සේවා මුලස්ථානයේ පිහිටි විරු ස්මාරකය ඉදිරිපිටදී රටදැය වෙනුවෙන් දිවිපිදු බුද්ධි සේවා විරුවන්ට පුෂ්පෝපහාර දැක්වීමෙන් පසු සර්ව ආගමික වතාවත් සිදුකරමින් මියගිය විරුවන් සිහිකරමින් පිං පැමිණවීම හා එම ආයතනයට, නිලධරයින්ට හා රටට සෙත් පැතීම සිදු කරන ලදී.

1941 වසරේ ඔක්තෝම්බර් මස 01 වන දින අපරාධ පරීක්‍ෂණ දෙපාර්තමේන්තුවේ විශේෂ අංශය ලෙස ආරම්භ කරන ලද ශ්‍රී ලාංකීය බුද්ධි සේවාව වරින් වර නාමික හා විවිධ ව්‍යුහාත්මක වෙනස්කම් වලට භාජනය වෙමින් පැමිණ 2006 වසරේ සිට රාජ්‍ය බුද්ධි සේවාව ලෙස නම් කරමින් මේ දක්වා මෙරට ජාතික ආරක‍්ෂාව සුරක්‍ෂිත කිරීමේ භාරධුර කාර්ය්‍යයේ නියැලී සිටි. වත්මන් රජය බලයට පත්වීමෙන් පසු අතිගරු ජනාධිපති ඝෝඨාභය රාජපක්‍ෂ මැතිතුමන්ගේ මගපෙන්වීම හා ගරු ආරක්‍ෂක ලේකම්තුමන්ගේ මෙහෙයවීම යටතේ ජාතික ආරක්‍ෂාව සුරක්‍ෂිත කරලීම සඳහා වු වැඩපිලිවෙලට අනුව රාජ්‍ය බුද්ධි සේවාව නව මානයන්ට යොමු කරමින් වෘත්තීය ප්‍රවීණත්වය, නව්‍යකරණය, තාක්‍ෂණ පහසුකම් පුළුල් කිරීම, පිරිස් බලය හා යටිතල පහසුකම් මෙන්ම නිලධරයින්ගේ සුභසාධන පහසුකම් දියුණු කිරීම හරහා එම ආයතනයට හා නිලධාරීන්ට නව ජීවයක් ලබාදෙමින් ජාතික ආරක්‍ෂාව සුරක්‍ෂිත කරලීමට අවැසි වටපිටාවක් නිර්මාණය කිරීමට සමත්වී ඇත.

මෙවර සංවත්සර උත්සවයේදී රාජ්‍ය බුද්ධි සේවාව මෙතෙක් ආ ගමන් මග පිලිබඳ ආවර්ජණයක් සිදු කිරීම හා එහි විසිරි තිබු ඉතිහාසය ග්‍රන්ථාරූඩ කර එය ‘Silent Guardians’ නමින් ‍ඓතිහාසික ග්‍රන්ථයක් ලෙස එලිදැක්වීම, සේවාවට අභිමානයක් හා නිලධරයින්ගේ චිත්ත ශක්තිය වර්ධනය කරමින් බුද්ධිය බලයයි නමින් තේමා ගීතයක් එලි දැක්වීම, රටදැය වෙනුවෙන් දිවිපිදු එම සේවාවේ විරුවන් සිහිකිරීම හා එම පවුල්වල සාමාජිකයින්ට උපහාර පිදීම, එම සේවාවේ උන්නතිය වෙනුවෙන් තම තුරුණුවිය කැප කරමින් වසර 35 කට වැඩි කාලයක් තම අඛණ්ඩ සේවාව ලබාදී විශ්‍රාම සුවයෙන් සිටින නිලධාරීන් හා වසර 35 කට වැඩි කාලයක් අඛණ්ඩව සේවයේ යෙදී සිටින නිලධරයින් ඇගයීමට ලක් කිරීම, එම සේවාවේ නිලධරයින්ගේ දරු දැරියන්ගේ ඉහල අධ්‍යාපන ජයග්‍රහණ වෙනුවෙන් ත්‍යාග ලබාදී ඔවුන්ව තවදුරටත් දිරි ගැන්වීම යන කරුණු කෙරෙහි විශේෂ අවධානයක් යොමුකර තිබිණි.

එහිදී ප්‍රධාන ආරාධිතයා වශයෙන් ගරු ආරක්‍ෂක ලේකම්තුමන් විසින් අදහස් දක්වමින්, තිස් වසරක් පුරා ඇවිලීගිය එල්.ටී.ටී.ඊ. යුධ ත්‍රස්තවාදය පරාජයට පත් කිරීමේදී එම මෙහෙයුම් සාර්ථක කර ගැනීම සඳහා රාජ්‍ය බුද්ධි සේවාව විශිෂ්ඨ කාර්ය්‍යභාරයක් ඉටු කරන ලද බවත් පුරා වසර දෙකකට ආසන්න කාලයක් විහිදි යමින් තිබෙන කොරෝනා මර්ධන වැඩපිලිවෙලේදීද මෙම සේවාව ප්‍රමුඛ සේවාවක් ඉටුකරමින් සිටින බවත් ප්‍රකාශ කරන ලදී. එසේම ත්‍රස්තවාදය හා අන්තවාදය වැනි ක්‍ෂේත්‍රයන් කිහිපයකට සීමාවී තිබු රාජ්‍ය බුද්ධි සේවාවේ කාර්ය්‍යභාරය පුලුල් කරමින් අතිගරු ජනාධිපතිතුමන්ගේ නායකත්වයෙන් ජාතික ආරක්‍ෂාව තහවුරු කිරීම හා රට ගොඩනැගීම සඳහා දියත් කර ඇති වැඩපිලිවෙලට අනුව සෞඛ්‍ය, ආහාර, පරිසර වැනි සියලු ක්‍ෂේත්‍රයන් හරහා රාජ්‍ය බුද්ධි සේවාව ප්‍රමුඛ සියලු බුද්ධි අංශ වල සහය ඉදිරියේදී බෙහෙවින් බලාපොරොත්තු වන බවද අවධාරණය කරන ලදී.

රාජ්‍ය බුද්ධි සේවාවේ අධ්‍යක්‍ෂ ජෙනරාල් තුමන්ගේ මගපෙන්වීම යටතේ සංවිධානය කර තිබු මෙම අවස්ථාවට ආරාධිතයින් වශයෙන් මහජන ආරක්‍ෂක අමාත්‍යාංශයේ ගරු ලේකම් මේජර් ජෙනරාල් ජගත් අල්විස් (විශ්‍රාමික), පොලිස්පති චන්දන වික්‍රමරත්න, ජාතික බුද්ධි ප්‍රධානී මේජර් ජෙනරාල් රුවන් කුලතුංග (විශ්‍රාමික) යන මහත්වරුන් හා ත්‍රිවිධ හමුදා බුද්ධි අධ්‍යක්‍ෂවරුන්ද එක්ව සිටියහ.

Leave a Comment

Your email address will not be published. Required fields are marked *